Det seier Egil Lillerovde, Monica Liset Hauge og Kjell-Bjarte Varpe, som saman med Magne Elde, Havly og Bremanger Kino & Scene er initiativtakarane til Musikkweekend for andre året på rad.

Også i år blir det satsa på intim klubbstemning og hageparty på og rundt Havly tre dagar til ende, frå torsdag 16. juli til laurdag 18. juli.

Laurdag entrar Tom Principato og bandet hans klubbscena på Havly. Med meir enn 40 år bak seg som gitarist og songar, kan Principato trygt kalle seg ein av veteranane innan amerikansk blues, funk og soul.

Også fredagen blir det amerikanskinspirert musikk frå scena, då med The Topangas i aksjon.

Dei lokale heltane er heller ikkje gløymde, og torsdagskvelden er sett av til jam, med sosialt fellesskap både på og utanfor scena på Havly.