Ungar frå Nordfjord skal på barne-TV i beste sendetid før jul. I serien «Her er eg!» skal vi møte seks ungar, fem av dei frå Nordfjord og ein frå Florø.

Sivert Liset Osland har høner og egg i uthuset. No ventar han på at det skal kome ut lysegule kyllingar. For at kyllingen ikkje skal fryse, brukar han mamma si symaskin til å lage skjerf til kyllingen.

- Serien blir sendt rett etter Jul i Blåfjell. Det er laga 27 episodar i alt, og åtte av dei skal sendast neste år, fortel regiansvarleg Eva Westvik i NRK Sogn og Fjordane.

Ho har laga serien i lag med fotografane Torje Bjellaas og Merete Høidal. Så langt er tre av episodane utveksla gjennom den Europeiske Kringkastingsunionen til utanlandske kanalar i Europa, Afrika og Asia.

Dei andre borna i serien er Alexa Rogdo Melheim frå Heggjabygda i Eid, Linn Kristin Saltkjel frå Saltkjelen i Vågsøy, Per Haus Nore frå Haus i Eid, Berge Torheim Andal frå Måløy og Ananda Bickhardt frå Selje.