– Utan den gode dugnadsånda i laget hadde det aldri gått. Og messa er viktig for drifta av laget. Det er inntektene vi klarar å skape under messa som er hovudgrunnlaget for drifta vår resten av året, seier leiar i Florø husflidslag, Gunnfried Sund til Firdaposten.

Årets messe samlar over 40 utstillarar, og fleire står på venteliste for å sleppe til. Det meiner Sund er eit kvalitetsteikn for messa. Hovudutstillarane i år kjem med sølvarbeid, og i tillegg blir det måleri, trearbeid, keramikk, strikk, smijarnsarbeid, kosmetikk og ulike spennande nisjematprodukt som urter, pølser og flatbrød. Og utstillarane kjem frå heile landet.

Berre handverk

I fjor samla messa heile 1500 besøkande over to dagar. Produkta folk får kjøpe har ein viktig fellesnemnar:

– Vi slepp ikkje til utstillarar som sel «kjøpeprodukt» eller halvfabrikat. Ting skal vere heimelaga, slår Sund fast.

På årets messe blir det også utstilling av produkt frå ungdomsgruppa i husflidslaget, Ung Husflid.

Puteutstilling

I tillegg til sal av husflidsprodukt blir det åresal og kafédrift i regi av arrangørane. Du kan også få med deg utstillinga av gamle sofaputer, som husflidslaget har samla inn lokalt i løpet av hausten.

– Somme opplever at husflidsprodukt har blitt dyre. Kva meiner du?

– Då bør folk tenke over at dei kjøper handlaga kvalitet. Eg trur ikkje timeløna til dei som lagar arbeida er særleg høg, seier Sund.