Parallelt med Florarevyen 2009 skal det jobbast med ei jubileumsoppsetning der publikum vil få sjå ei «best of..»-framsyning med det beste frå dei ti åra til Florarevyen.

Difor er det med gru at Per Øyvind Helle no opplever at dei ikkje lenger har lagerplass til alle kostyma og kulissane dei har laga opp gjennom åra.

Treng hjelp

– Vi har vore heldige og fått hatt kulissane på Miljøhuset til no. Her har vi vore på overtid nokre månader. Vi har jobba med alternative lokale utan å lukkast, seier Helle. Han håpar nokre kan stille opp og hjelpe dei ut av knipa, og fortel at behovet er 30-40 kvadratmeter som kan huse resultatet av revyarbeidet gjennom ni år.

Skattkiste

– Vi må ha nye kulissar kvar gong, men vi tek igjen figurar og nummer innimellom. Den gjentakinga er viktig i revy, og det skal dessutan leggast til at mykje er allereie kasta, seier Helle.

Han meiner revyen sit på ei skattkiste.

– Spør du meg, skulle vi hatt ei vindaugsutstilling i Strandgata for å vise berre litt av dei fantastiske kulissane og kostyma vi har skapt opp gjennom åra, avsluttar Helle.