Han skal saman med over 50 andre ungdommar framføre rockemusikalen på torget i Florø.

Åsmund Kjelsnes frå Florø er no busett i Stavanger, og studerer dans ved universitetet der. I sommar er han heime for å delta under oppsetjinga av musikalen Jesus Christ Superstar. Denne helga var instruktørar, skodespelarar, dansarar og songarar samla i Florø for øving, og Åsmund deltek både som dansar og korsongar.

– Det vert nok mange kostymeskift på meg. Koret er jo på scena nesten heile tida, så eg får nok å gjere, smiler han.

Når Åsmund leste om oppsetjinga av musikalen i Firdaposten, og såg at arrangørane søkte etter folk, ringde han straks og melde seg på audition.

– Eg tenkte det var ein kjekk måte å tilbringe sommaren på, i staden for å vere i Stavanger. Spesielt då eg såg at det var fleire lærarar og ungdommar som eg kjende frå før som skulle delta. Eg hadde rett i att det vart gøy, det er veldig sosialt å vere med! Dessutan er det ekstra kult at musikalen er på nynorsk.

Åsmund har eit litt spesielt forhold til Jesus Christ Superstar.

– Mamma er veldig glad i den, så eg har på ein måte vekse opp med denne musikken. Mamma har ein 4-dobbel LP frå originalinnspelinga, og eg pleidde å syngje til den når eg gjekk på barneskulen. Ho var også på kinopremieren i Oslo, det er jo litt stilig, smiler han.

Til hausten skal Kjelsnes starte på sitt andre år av ei treårig barchelorgrad i dans ved Universitetet i Stavanger.

Han synst det er veldig kjekt at han skal stå på scena i Florø att, det har han ikkje gjort sidan han for nokre år sidan var slagverk- og songelev på kulturskulen.